لانى بحبك

بسم الله الرحمن الرحيم والصلاه والسلام على النبى الامين

محمد بن عبد الله خير المرسلين عليه افضل الصلاه والسلام

رب اشرح لى صدرى ويسر لى امرى واحلل عقدة من لسانى يفقهوا قولى

السيشن بعنوان لانى بحبك

** لو اى حد فيكم بيمتلك حاجة بيحبها قوى وغاليه عليه جدا وعارف قيمتها كويس لانها من حد عزيز عليه

تخيلوا معايا هيتعامل مع االحاجة دى ازاى ...بكل حرص بكل عنايه بكل حب لان هيخاف الحاجة دى تضيع منه او يخسرها صح

** طيب تخيلوا لو عندك حاجة من شخص عادى هتتعامل مع الحاجة دى ازاى

اعتقد انك هتحطها زينه وفين وفين لما تبقى تمسكها وتمسح التراب اللى عليها وتفتكر صاحبها او فين وفين لما تمسكها وتقول ياه دى غاليه ازاى انا سبت التراب عليها صح

** مابالك بقى حبيبك اللى خلقك اهداك هديه كبيره قوى اداك احلى جوهره وقالك حافظ عليها ... والجوهره دى انت _ نفسك _ ذاتك ...هل انت فعلا عارف قيمه الهديه دى ولا سبت التراب يغطيها

** عمرك قولت لنفسك انا بحبك ......الشعور دا كتير منا بيفتقده

(ممكن اطلب من حضراتكم طلب كل واحد فيكم يغمض عينه ....ويبص على نفسه)

منا اللى هيشوفها مبتسمه ومنا اللى هيشوفها مكشره ومنا اللى هيشوفها مدياله ضهرها ومنا اللى هيشوفها بتبكى ومنا اللى هيشوفها بتتخانق وفى صراع

** الانسان مبيعرفش يقعد مع حد فى اوضه واحده وهو مش طايقه هيفضل كل واحد فيهم يشكك فى كلام التانى وخناق وكل واحد فيهم هيتمنى التانى يخطىء عشان يجلده فيبقى ازاى انت ممكن تعيش مع نفسك وانت مخاصمها وانت مخليها مدياك ضهرها وانت دايما بتلومها وبتعاتبها دايما بتجلدها وتجرحها لغايه ماخلتها تبكى

** .بس علفكره الحب اللى اقصده هنا واللى بتكلم فيه مش حب شفهى ...حب عملى بمعنى ....انا ممكن افضل اسمع نفسى بحبك بحبك بحبك طيب وبعدين ايه الدليل على كدا

الدليل انى اقعد معاها واعمل معاهده سلام

** ازاى انت عايز تكون ناجح وتأمن حياتك الخارجيه وانت مهدد بحياتك الداخليه وخلوا بالكم وصدقونى السلام النفسى لا يقل شىء عن السلام الاجتماعى فلو انت فعلا عايز تعيش حياه سعيده لازم تتصالح مع نفسك الاول

** وطبعا انا متأكده ان مفيش فينا حد وصل للمرحله اللى كره فيها نفسه لانه لو مش بيحبها مكنش جه هنا ....كان قالها انت متستهليش انك تتعلمى حاجة جديده

و تعالو ندخل دلوقتى فى موضوعنا عشان نوصل اننا لما نقول بحبك ياأنا وتكون بجد مش كلام وخلاص

الاول يعنى ايه بحب نفسى :

بحب نفسى معناها انى بتقبلها زى ماهى ....ومشوفهاش ابدا اقل من اى حد ...احب كل حاجة ربنا ادهالى فى نفسى سواء مميزات او عيوب

...اؤمن بيها وبأهميتها ...وانها شىء عظيم وتكون متأكد ميه فى الميه ان مفيش حد احسن من حد ....زى ماجدتى دايما تقولى كل واحد عنده 24 قيراط لكن متوزعين بنسب مختلفه ...كانت تقولى جمعيهم واعملى حاجة تحبيها وتتميزى فيها ومتركزيش على اقل نسب وتكرهى نفسك بسببهم

ليه انا احب نفسى واصالحها ؟

اول حاجة عشان انول رضا ربنا

عشان اكون سعيده فى حياتى

وعشان احقق اهدافى وطموحاتى اصل لايمكن شخص مبيحبش نفسه ويسعى لتحقيق اى نجاح

ولغاية امتى هيفضل بين كل واحد ونفسه صراع لاى سبب من الاسباب

انا لازم اصالح نفسى واكون متأكد ان مهما حصل فأنى بعيش حياه افضل من ملاييين الاشخاص وان ما اخطأنى ما كان ليصيبنى وان ما أصابنى ما كان ليخطأنى...

إنه القدر...لازم اشكر ربى عليه

طيب بأمانه مش شايف نفسك تستاهل انك تصالحها

ايه الاسباب اللى ممكن تمنعنا اننا نعيش حاله من السلام النفسى ؟

وعايزة مشاركاتكم ....بدى جوايز علفكره

عندنا 4 جوانب روحانى _ عقلى _ جسدى _ اجتماعى

لو اختل اى جانب من الجوانب دى هتلاقى دائما فى صراع بين الشخص ونفسه

جسدى

ان مثلا يكون فيه عيب خلقى _ او مثلا يبص فى المرايه يقول اف مناخيرك مكعبره ولا انت محوله كدا ليه او او او

روحانى

وجود اختلاف بين مبادئه الداخليه وافعاله مثلا عارف ان غض البصر حرام رغم كدا مش قادر يمسك شهوته

اجتماعى

انه دايما منتقص من قدره وشايف نفسه اقل من االاخرين ودا بيكون ناتج من عدم ثقه بالنفس واللى ناتجه طبعا من كميه الرسائل السلبيه اللى بقعد ارسلها لنفسى

انا مش هقدر انا مش هنفع انا فاشل انا محبط

واجتماعى برضو فى انه مش راضى بالوضع الاجتماعى اللى هو فيه او البيئه اللى نشأه فيها

عقلى

انه يحط هدف وميحققوش لاى ظروف ميقدرش يحققه

الاسباب كتير قوى وبتختلف من شخص لاخر

لكن مهما قولنا اسباب هنلاقى ان بدايتها قله الوازع الدينى

لانه لو الجانب الروحانى عنده مشبع هتلاقيه بطبيعته راضى بكل شىء

فهيكون فيه سلام بينه وبين نفسه

تعالو نعرف ازاى نحب انفسنا

اولا اتفقنا ان كل واحد عنده الشىء اللى يميزه يبقى دلوقتى اثبت انى بحب ذاتى ازاى ...اول حاجة خالص لازم اقعد مع نفسى فى ساعه صفا

وتبدأ تتصالح فيها من غير جلد من غير صراع واسمى الجلسه دى

( جلسه مصالحه مع الذات )

والجلسه دى ليها شروط

** وبم ان نيتنا دايما سليمه فهنفترض ان واحد اتصل على خطيبته واداها ميعاد انه هيقابلها

طبعا اول حاجة لازم يكون وقت اجازه وقت راحه

تانى حاجة هيجيب القميص والبنطلون اللى على الحبل

ويحط برفان يعنى من الاخر لازم يكون على سنجه عشره

وطبعا هياخد خطيبته اى مكان شيك عشان يتكلموا سوا

** طب بزمتكم نفسك حبيبتك اللى عايشه معاك واللى ملكوش غير بعض

ملهاش نفس هى كمان تخرج تغير جو معاك كدا لوحديكم

يبقى لازم تديها تليفون الاول تعرفها انك عايز تقابلها لانها وحشتك قوى

وبرضو عشان هى كمان تجهز حالها

ولازم تكون جسمانيا ونفسيا مرتاح .....تلبس احسن طقم عندك ....تحط برفان بتحبه وتروح مكان واحسن مكان بجد يأما على البحر يأما فى مكان اخضر

وانا عن نفسى بطلع فوق السطح معرفش ليه

اى مكان ترتاح فيه نفسيا وتكون لوحدك من غير اى تأثيرات خارجيه

طبعا تكون واخد معاك ورقه وقلم ( الشىء لزوم الشىء )

طبعا لازم اكون صريح وصادق مع نفسى

لان صعب ان انت تكون حد تانى

اولا اسأل نفسى (من تكونى )

لما استاذى سألنى فى يوم انت قائده لذاتك ؟1 سكت

قالى انت بتقدرى تقرى ملفات ذاتك ...برضو عجزت عن الاجابه

بان عليه الضيق قوى وقالى تغريييد انت مين ؟!

ساعتها قولتله معرفش :(

افتكرت وقتها فيلم اليس فى بلاد العجائب لما الفراشه سألتها من انت ؟! قالتلها ..لااعرف

كتير مننا ميعرفش اجابه وكتير مننا فاقد الثقه فى اجابته

لازم العمق فى الاجابه احنا مبنسألش عن الاسم والعمر لا

احنا بنسأل عن

انت عايز ايه

ايه مؤهلاتك لكدا

هل انت عارف اللى ليك واللى عليك

ازاى هتعرف تعمل كل اللى انت عايزه

واهم حااجة

اننا لازم نعرف احنا واقفين فين

وهنمشى اى طريق والطريق دا هيودينا لفين

لازم تبقى عارف انت عايز تروح فين

نرجع تانى لأليس

لما ضلت طريقها وسألت القط اخد انهو طريق

قالها : انت عايزة تروحى فين

قالتله : معرفش

قالها : يبقى متفرقش ...اى طريق هيوصلك لكن لفين ..معرفش لكن هيوصلك للنهايه

لازم احدد هدفى من اى طريق هسلكه واكون متأكده ان الطريق دا هيوصلنى للمراد

طبعا دا بيتحدد من كذا حاجة هنقولهم سوا

** اولا انى اكتب مميزاتك مواهبك قدراتك كل حاجة انت شايفه جميله من نفسك

واركز على اكتر ميزتين فيا

** تانى حاجة اكتب السلبيات بحيث اكتب اركز على سلبيتين هما سبب لمشاكل كتير فى حياتى

بالطريقتين دول كدا انت عرفت نفسك

** تالت حاجة افكر فى الطرق اللى بيها ابدأ ابني سواء انى انمى الشىء المميز ليا

اما السلبيات امسك واحده واحده واركز جهدى عليها واصبر على نفسى وابدأ اتخلص منها لو جزئيا وادى احتمال للغلط

لان فيه شخصيات خلاص اخدت قرار التغيير خلاص انا هتغير 180 درجه والطبيعى انها مش هتكمل وتبدأ تغلط تانى

ساعتها بتخاصم نفسها بطريقه اسوأ من الاول وتفضل تكسر فيها اكتر

انت ايه ياشيخه مبتفهميش بتتعلميش هتفضلى كدا

لا لازم تاخد نفسك على الهادى فى الاول

** وواحده واحده هتبدأ تحس بسعاده جواك انك فى تطور مستمر

الاهتمام بيكون فى كل الجوانب جانب دينى نفسى جانب عقلى جسدى روحى

** وعارفين بقى كمان كل ماتعملوا حاجة حلوة كافئوا انفسكم بمعنى امنية النهارده اتصرفت بشكل رائع على غير العاده او انها بدأت تطور فى قصور ما يبقى اكافئها والطرق كتير

تجيبلها شوكولاته تخرجها فى جنينه تشتريلها حاجة بتحبها سيان

** عارفين انا بتعامل مع نفسى زى الطفل بمعنى لو عندك طفل لوغلط عمرك مابتضربه بتفهمه وتنصحه بالراحه وبهدوء مره واتنين صح ولما بيعمل حاجة تعجبك بتبوسه وتشكره لما يبكى من حاجه ضايقته بتطبطب عليه

لو جرحته بتعتذرله مش تقولها تستاهل

** نفسى بجد كل واحد يعيش مع نفسه حاله من الحب و الاحترام المتبادل

زى مااحنا عارفين ان اى علاقه بين اتنين مفيش بينهم احترام احكم على العلاقه دى بالفشل

فى الافلام بنلاقى ان اى شخص بيواجه مشكله او ازمه بيلجأ للخمر او الادمان عشان يدمر نفسه وكأنه بينتقم منها وكأنها سبب فى المشاكل اللى هو فيها .....برضو تعالى نشوف اى واحد فينا لما بيواجه مشكله تلاقيه قفل على نفسه وبدأ يدخل فى اعراض اكتئاب ومياكلش ولا يشرب

من امتى كان عقاب نفسى بتدميرها كان طريق لحل مشكله

** النفس ملهاش ملجأ غير اللى خلقها عشان يعيد تقويمها وتأكد ان كل شىء بحكمه وكل شىء بيحصلك خيير ودايما تقول قدر الله وماشاء فعل

مش تقعد تزعق فى نفسك وانت وانت وانت الندم عمره مابيرجع اللى فات لكن اتعلم منه

فأرحم نفسك وثق بربنا

** وتأكد انك كل شىء سيىء بتقولوا لنفسك بيوصل للشخص اللى قدامك وهيقول عليك نفس الشىء

النهارده ارجوكم بلاش حد يبات وهو زعلان من نفسه على الاقل لو مش هيصالحها النهارده يديها تليفون بس يعرفها انهم هيتقابلوا بكره

لازم اؤمن انى انسان خلقنى ربنا عز وجل وكرمنى (ولقد كرمنا بنى ادم وحملناهم فى البر والبحر وبلاش ابنى بينى وبين نفسى جدار وخلى بينك وبين نفسك دايما عمار اتفقنا

بجد بشكركم من كل قلبى وفعلا استمتعت معاكم جدا

واتمنالكم دوام السعاده والتوفيق

اختكم فى الله

تغريد احمد

واللى حابب يحضر معانا اى سيشنات اون لاين يضيف الميل دا عنده

FREE.ONLINE4TANMYA@YAHOO.COM